(Das Strandbad in Klagenfurt an einem nebligen Oktobermorgen 2019, menschenleer bis auf, am Ende des Steges, zwei ehemalige Beachvolleyball-Nachwuchsspieler in schwarzen Stiefeln, schwarzen Hosen und schwarzen Jacken mit der Aufschrift "Security". Sie werfen Kieselsteine ins Wasser.)

DER ERSTE: Summa vuabei, ha?
DER ZWEITE: Schaut aus.
DER ERSTE: Schas, oda?
DER ZWEITE: Eh.
(Pause)
DER ZWEITE: Noch vül schasa is, doss danoch glei onfongt Winta.
DER ERSTE: Konn ma nit sogn.
DER ZWEITE: Ah so? Host du schon amol g'heat, doss noch Heabst nit glei onfongt Winta? DER ERSTE: Dos man i nit. Schasa. Konn ma nit sogn.
DER ZWEITE: Warum nit? Is vielleicht nit schasa Winta wia Heabst?
DER ERSTE: Schon. Oba Schas Hauptwuat. Ka Steigerung. Drum konn man nit sogn schasa, konn ma lei sogn, Winta greßara Schas wia Heabst.
DER ZWEITE: Von mia aus, wonnst manst ...
(Lange Pause. Kieselsteine.)
DER ERSTE: Und weast segn, See wead heia aa wieda nit zuagfrian.
DER ZWEITE: Eh. Des is sowieso des Oascheste.
(Vorhang)
(Antonio Fian, 18.10.2019)